INEGA Instituto Enerxético de Galicia

Play
Conselleria de Economía e Industria

CONDE DESTACA QUE AS DIRECTRICES ENERXÉTICAS DE GALICIA FOMENTAN AS ENERXÍAS RENOVABLES, O AFORRO, A EFICIENCIA E A MOBILIDADE

27/06/2018

  - O conselleiro de Economía, Emprego e Industria, Francisco Conde, participou hoxe en Vigo na xornada sectorial "Directrices enerxéticas de Galicia: cara unha economía verde", organizado polo Círculo de Empresarios de Galicia.

 - Explicou que Galicia está aportando á transición enerxética cun investimento previsto de 3.000 millóns de euros nos próximos tres anos, o que permitirá un incremento da capacidade renovable en 1.200 megavatios.
 
- O titular de Economía apuntou que no novo modelo enerxético é preciso dar unha resposta concreta ás necesidades dos consumidores e das empresas desde o punto de vista da competitividade da industria.
 
Vigo, 27 de xuño de 2018 - O conselleiro de Economía, Emprego e Industria, Francisco Conde, participou hoxe en Vigo na xornada sectorial Directrices enerxéticas de Galicia: cara unha economía verde, organizado polo Círculo de Empresarios de Galicia, a través do seu Foro de Enerxía e Medio Ambiente, onde puido compartir o contido das Directrices Enerxéticas de Galicia, a folla de ruta para impulsar un novo modelo enerxético na Comunidade galega.
 
Conde explicou que a transición enerxética ten que camiñar cara a unha enerxía máis limpa fundamentada nas enerxías renovables e a través de medidas que fomenten o aforro e a eficiencia enerxética e cara unha mobilidade máis sostible que permita a introdución do vehículo eléctrico e o desenvolvemento de enerxías vinculadas co gas. Subliñou, ao respecto, que a través da mobilidade sostible conseguirase un menor impacto medio ambiental. En palabras de Conde, estes retos son eixos principais das Directrices Enerxéticas de Galicia que se fundamentan “nas enerxías renovables, no aforro e na eficiencia enerxética e na mobilidade sostible”.
 
Para acadar estes obxectivos, a Administración autonómica ten previsto un investimento de 3.000 millóns de euros nos próximos tres anos que, segundo apuntou Conde, permitirá con accións concretas o incremento da capacidade renovable en 1.200 megavatios, o que suporá un investimento de 1.300 millóns de euros. Segundo engadiu o conselleiro, isto permitirá que “a nosa enerxía, a nosa economía, sexa máis verde e máis renovable”. Tamén garante, tal e como afirmou, que “Galicia está aportando a este novo modelo e a esta transición enerxética”.
 
O titular de Economía apuntou, así mesmo, que neste novo modelo enerxético é preciso dar unha resposta concreta ás necesidades dos consumidores e das empresas desde o punto de vista da competitividade da industria e desde o punto de vista do impacto económico e social.
 
Para rematar, o conselleiro asegurou que estas directrices supoñen “unha aposta importante para a nosa competitividade e a nosa economía, e tamén para garantir unha economía máis sostible de cara ao futuro”.