Lorenzana reclama que la nueva planificación eléctrica esté aprobada cuanto antes porque “es urgente” para el desarrollo industrial de Galicia

Confirma que recolle parte das alegacións presentadas pola Administración galega, aínda que deixa outras actuacións pendentes que a Xunta agarda que estean recollidas “nesta ou nas seguintes modificacións”; entre elas, a zona da Plisan e a área central da provincia de Lugo

Pide axilidade na tramitación e na execución das obras, e que se acompase todo ese reforzo da rede ao desenvolvemento de solo industrial que se está rexistrando na Comunidade

Madrid, 27 de setembro de 2026

A conselleira de Economía e Industria, María Jesús Lorenzana, solicitou hoxe ao Goberno “a necesaria celeridade” para que a nova planificación da rede de transporte eléctrico deseñada polo Ministerio para a Transición Ecolóxica e o Reto Demográfico estea aprobada canto antes, porque “é urxente” para o desenvolvemento industrial “tan forte” que está a ter Galicia.

Lorenzana participou hoxe nunha reunión de traballo co secretario de Estado de Enerxía, Joan Groizard, acompañada do secretario xeral de Industria e Desenvolvemento Enerxético, Nicolás Vázquez, e do director xeral de Planificación Enerxética e Minas, Pablo Fernández Vila, onde se avaliou o estado de tramitación da nova planificación.

“Por un lado, se nos confirma que a intención é que finalice a tramitación e se poida aprobar a nova planificación a finais de ano”, manifestou Lorenzana ao finalizar a xuntanza, para indicar que o proxecto recolle parte das alegacións presentadas por Galicia, aínda que deixa outras pendentes que a Xunta agarda que estean recollidas “nesta ou nas seguintes modificacións”.

En particular, quedan sen atender, e son zonas “prioritarias”, a área da Plisan e toda a conexión entre a provincia de Pontevedra e a de Ourense. Tamén a zona central de Lugo, que conecta coa provincia da Coruña, e o enganche con Curtis, “unha zona moi industrial e que agora non está reforzada”, dixo.

Con respecto á Plisan, que non ten conexión suficiente, a Xunta solicitou que se busque unha solución. “É necesario que nesta ou na seguinte modificación puntual, de xeito urxente, se acometa ese investimento”, remarcou.

Lorenzana lanzou unha dobre petición: axilidade na tramitación e na execución das obras, e que se acompase todo ese reforzo da rede ao desenvolvemento de solo industrial que se está rexistrando en Galicia. De feito, a conselleira entregou a planificación para o período 2025-2030 que a Xunta está a desenvolver neste ámbito, co fin de que se busquen os mecanismos necesarios para garantirlles subministración eléctrica ás industrias. “É clave a axilidade, tanto na tramitación como na execución das obras para que de aquí ao ano 2030 estea a rede reforzada”, concluíu.