A Xunta impulsa a mellora da eficiencia enerxética en instalacións municipais de Chantada
O delegado territorial de Lugo, Alfonso Villares, explicou que se concederon senllas axudas para instalacións de xeotermia na Biblioteca Municipal e no edificio da Policía Local
Chantada (Lugo), 15 de setembro de 2026
A Consellería de Economía e Industria concedeu ao Concello de Chantada senllas axudas para a mellora da eficiencia enerxética na Biblioteca Municipal e no edificio da Policía Local, onde se está a habilitar tamén a futura sede do Centro de Atención Temperá; suman un importe de 58.000 euros.
O delegado territorial da Xunta en Lugo, Alfonso Villares, visitou hoxe as instalacións xunto co alcalde, Manuel Lorenzo. Os traballos, que están practicamente rematados, consistiron na execución do sistema de calefacción por xeotermia, incorporando solo radiante e bombas de calor coa potencia axeitada para cubrir a demanda dos distintos espazos.
Os apoios son xestionados polo Instituto Enerxético de Galicia (Inega) con fondos europeos NextGeneration destinados a promover o desenvolvemento das enerxías renovables, reducir a demanda enerxética dos edificios e infraestruturas públicas, e diminuír a dependencia dos combustibles fósiles.
