A Xunta salienta que a nova Lei de Recursos Naturais abre un “camiño diferencial” para unha nova política industrial e enerxética en Galicia
A directora do Igape, Covadonga Toca, participa no III Club APD Sustentabilidade, onde pon en valor esta norma para regular os instrumentos novidosos, seguir avanzando cara a descarbonización e xerar riqueza na Comunidade
Subliña a importancia de promover unha política económica vencellada á atracción de empresas, a aumentar o peso industrial, e ao aproveitamento dos recursos naturais e o desenvolvemento enerxético de Galicia
Destaca o papel que está a xogar a nova Oficina Económica de Galicia, que ofrece ao tecido empresarial unha nova forma de relacionarse “máis áxil, máis próxima e máis sinxela”
Resalta a aposta pola innovación a través da rede de aceleradoras que inclúe a nova Business Factory Ambiental (Clima-Tech), que se suma ás BFAuto, BFFood e BFAero, e tamén a aceleradora multisectoral de ViaGalicia
Santiago de Compostela, 5 de decembro de 2024
A directora do Igape, Covadonga Toca, destacou no III Club APD Sustentabilidade que a nova Lei de Recursos Naturais de Galicia, recentemente aprobada, representa un “camiño diferencial” para a configuración dunha política industrial e enerxética adaptada ás necesidades da comunidade.
Neste sentido, Toca Carús subliñou que esta normativa sentará as bases para avanzar na descarbonización, xerar riqueza no territorio e fortalecer a autonomía estratéxica de Galicia. Segundo explicou, a lei xorde co obxectivo de “asegurar a xestión responsable dos recursos naturais de Galicia de maneira que se protexa o ambiente, se cree riqueza e a riqueza creada impacte no territorio”.
A directora fixo fincapé na importancia de que os beneficios derivados do aproveitamento dos recursos naturais queden na comunidade, contribuíndo a mellorar as condicións de vida da poboación galega.
A nova normativa, destacou Toca Carús, permitirá organizar territorialmente Galicia desde un punto de vista enerxético e industrial, aproveitando as sinerxías entre ambos sectores. Ademais, sinalou que este marco xurídico regula instrumentos novidosos, pioneiros no ámbito estatal, que favorecen o desenvolvemento sustentable. “Galicia conta cos recursos naturais, polo que debemos asegurarnos de que tamén contamos cos beneficios que estes recursos achegan,” afirmou.
Entre os beneficios sociais e económicos que a lei promove, a directora mencionou a creación de emprego, a protección ambiental, o fomento de novas inversións e a redución dos custos enerxéticos para consumidores e industrias. Tamén subliñou que esta normativa sitúa a Galicia á vangarda das estratexias que buscan fortalecer a resiliencia fronte a crises globais recentes.
A Oficina Económica de Galicia
Covadonga Toca aproveitou o encontro para destacar o traballo do Igape no acompañamento ao tecido empresarial galego, reforzando as súas capacidades de apoio para 2025. Indicou que o organismo continuará impulsando unha política económica centrada na atracción de empresas, o aumento do peso industrial e o desenvolvemento enerxético. Ademais, mencionou a nova Oficina Económica de Galicia, que desde o pasado mes de abril ofrece unha “nova forma de relacionarse co tecido empresarial, máis áxil, máis próxima e máis sinxela”.
“Calquera persoa ou empresa que queira apostar por Galicia debe saber onde acudir. A Oficina Económica é ese punto singular de contacto para facilitar información, asesoramento, apoio e acceso a financiamento,” explicou, destacando o enfoque personalizado e interdisciplinar deste servizo.
Así mesmo, outro punto salientable foi a aposta pola innovación, que Toca Carús vinculou coa sustentabilidade. Neste marco, puxo como exemplo a creación da Business Factory Ambiental (Clima-Tech), unha nova aceleradora de startups destinada a proxectos de impacto ambiental positivo, cun orzamento de máis de 6 millóns de euros. “Esta iniciativa súmase ás aceleradoras existentes, como BFAuto, BFFood e BFAero, e reforza o compromiso da Xunta con modelos produtivos innovadores e respectuosos co medio,” sinalou.
